A actual
situación de Club Deportivo Ourense é moi preocupante. Durante os últimos anos
a supervivencia do club está no aleiro. Tempada tras tempada as descomunais
débedas acumuladas (das que por certo ninguén respondeu por elas) deixan ao
bordo da desaparición ao club. Finalmente sempre se conseguiu saír adiante, ben
impulsado pola man salvadora das institucións (sobre todo cando ao fronte do
club estaba algún “amigo” das mesmas) ou ben pola tolería de afeccionados de
verdade como Manolo Rois e os seus colaboradores ou como os actuais integrantes
do Consello de Administración.
Sen embargo nesta
ocasión a supervivencia do club está máis complicada que nunca. As institucións
xa non apoian coma antes, penso que o que pasaba anteriormente tampouco era
normal e os clubs teñen que ter a súa maior fonte de financiamento nos seus
propios recursos. Pero o máis preocupante non é iso, senón a falla total
de interese por parte dos máximos accionistas de C.D.Ourense.
Deles non se sabe
nada. Nunca ouvín, lin ou vin algunha declaración dos mesmos. Nas asembleas de
accionistas nunca aparecen, delegan o seu voto, ou xa nin iso, como ocurreu na
última, onde se tivo que suspender para o día seguinte ao non haber o
suficiente quórum.
A miña impresión
é que pasan absolutamente do club, limitándose a esperar acontecementos. Eles
deixan que colla o club o que estea interesado, como aconteceu nesta última
ocasión con Alejandro Estévez e o seu equipo, e a ver que pasa. Si o club vai
ben e, por un casual, consigue o ascenso, fenomenal, xa están eles aí para
volver a facerse cargo del no caso de que sexa rendible. Se todo vai mal pois
péchase o chiringuito e adeus moi boas, os responsables serán os aventureiros
que se arriscaron a salvar o club e que, por riba, serán os culpables,
salvándose eles de mancharse as mans coa desaparición do club.
Mentres estes personaxes,
que aínda non sabemos moi ben quen son e porqué se fixeron co club, sigan sendo
os donos o futuro é negro. Si tiveran un mínimo de dignidade e realmente
quixeran a Club Deportivo Ourense deberían desfacerse das accións do club.
Unhas accións que deberían retornar aos verdadeiros donos do club: os socios e
seareiros.
Pero para chegar
a este punto os afeccionados deberíamos de facer algo. Os seguidores de Club
Deportivo Ourense fomos e somos totalmente pasivos. É o momento de espertar e
de loitar polo futuro do noso club se realmente queremos manter con vida máis
de 60 anos de historia, con fazañas épicas como a dos 30 partidos – 30 vitorias
da liga 67-68.
Se de verdade
queremos que o club siga vivindo chegou o momento de mobilizarse e facerse
ouvir, ese será o único xeito de cambiar o destino do noso club. Seguir o
exemplo de afeccións como a do Oviedo ou Rácing de Santander, que conseguiron
botar do seu club as persoas que os estaban afundindo.
Pero iso non será posible de xeito individual. Un por un non
somos ninguén. Sen embargo todos
xuntos e unidos podemos inverter o rumbo de C.D.Ourense cara os acantilados, e
evitar, deste xeito, o seu naufraxio. Hoxe máis que nunca cómpre que xurda unha
asociación de seareiros e pequenos accionistas de C.D.Ourense que acade o maior
número de integrantes posibles para plantarlle cara aos máximos accionistas e
conseguir que o club volte as mans das que nunca debeu saír: dos seus seareiros.
As peñas, como
colectivos organizados que son, deberían de tomar a iniciativa para constituír
unha asociación de seareiros e pequenos accionistas que loiten polos seus
dereitos e por Club Deportivo Ourense. Doutro xeito o futuro do noso club corre
serio perigo.
Cando hai que mercar accions onde estan os afeccionados de verdade ,nada que veña un inversor de fora e que pague e logo a exisirlles amor a unas cores que nunca sentiron. cada clube ten o que se merece a sua afeccion, se non se pode estar en 2ª B pois a competir en terceira ou en preferente en donde cheguen os recursos sen endevedarse ,mellor esto que desaparecer
ResponderEliminar